Ad Altiora - Altyd Hoër

Afrikaans Huistaal en Eerste Addisionele Taal (graad 10 – 12)

Me Strydom matrikuleer aan die Hoërskool Wonderboom en behaal haar graad by NKP en BEd (Hons) by UNISA.

Hierdie bedrywige opvoeder rig die skool se eerste netbalspan af asook gewigstoot. Verder is sy ook aktief betrokke by die skoolkoerant, Koesterklanke en Debattering.

Musiek, lees, Uno is maar ‘n paar van die dinge waarmee sy haarself besig hou. Sy het ook twee Boerboele wat haar hart se punt is.

Ingenieursgrafika en Ontwerp (graad 10 – 12) en Tegnologie (graad 8 en 9)

Mnr Kriel matrikuleer aan die Hoërskool Vanrhynsdorp waarna hy by die Onderwys Kollege in die Paarl gaan studeer. Hy maak eers by Hoërskool Boesmanland en Hoërskool Montana ‘n draai voordat hy by Hoërskool Overberg aansluit. Elke jaar vaar sy leerders uitstekend in die NSS eksamens en het van sy leerders al van die top akademiese posisies landwyd beklee.

Hy is veral betrokke by die afrigting van rugby en krieket.

Houtwerk is een van sy passies en iets wat hy in sy vryetyd doen. Verder is hy iemand wat baie mooi staaltjies kan vertel met ‘n regte Boesmanlandaksent.

Fisiese Wetenskap (graad 10 – 12) en NW (graad 8 – 9)

Mnr Meyer matrikuleer aan Hoërskool Empangeni, Natal en behaal sy BSc (Hons Fisika), HOD aan die Universiteit van Stellenbosch. Hy het voorheen by Hoërskool Namakwaland skoolgehou.

Hierdie pa van drie (almal Ovies) is ‘n regte gesinsman en sy liefde vir kinders kan jy sien in die manier waarop hy sy leerders hanteer. Hy is betrokke by die afrigting van rugby en krieket. Sy 24 jaar ondervinding in sy vakgebied lei daartoe dat ons kinders uitstekende onderrig in Fisiese Wetenskappe ontvang en om hierdie rede is hy ook by verskeie Lenteskole betrokke.

Hy is ‘n buitelugmens wat graag hengel, kamp en lees.

English Home and First Additional Language, (grade 8 – 12)

Me Milne matrikuleer aan die Hoërskool Hermanus en gaan studeer by die Universiteit van Port-Elizabeth.

Sy begin as jong onderwyseres by Hoërskool Overberg, waar sy haar passie en liefde vir die Engelse letterkunde aan haar leerders oordra. Sy is betrokke by ons skool se dramavereniging.

In haar vrye tyd lees sy graag en geniet dit om in die natuur tyd te spandeer.

Wiskunde (graad 8– 10 en 12) en Kreatiewe Kunste (graad 8 – 9)

Enige Ovie-leerder sal kan bevestig dat Juffrou Stella die hartklop van die Ovie-gees is. Te danke aan haar kreatiwiteit en hardwerkendheid is ons skool se krete by ons Somer- en Winterinterskoles oraloor bekend. Sy is die koorleidster en onder haar leiding, het ons koor al van die hoogste toekennings by Eisteddfods ingepalm.

Me Augustyn matrikuleer aan die Hoërskool Hugenote waarna sy BMus Ed Hons aan die Universiteit van Stellenbosch behaal en voltooi ook Wisk II deur Unisa. Sy hou eers by Hoërskool Bonnievale skool voordat sy by ons aansluit. Wiskunde is haar passie en met haar kreatiwiteit sal sy altyd met ‘n uitdagende wiskundige probleem vorendag kom.

Vrye tyd is maar skaars by die besige juffrou, maar gedurende vakansies hou sy haarself besig met skilder, lees, naaldwerk en kosmaak.

Rekeningkunde (Graad 9 -12)

Me van Niekerk matrikuleer aan die Hoër Meisieskool Bloemhof en behaal haar BComm, HOD aan die Universiteit van Stellenbosch.

Sy is betrokke as afrigter by tennis en netbal. Haar liefde vir haar vakgebied, maak van haar ‘n gesogte Rekeningkunde-onderwyseres wat gereeld ekstra klasse vir leerders van ander skole aanbied. Vir hierdie juffrou is harde werk nie onderhandelbaar nie en dit kan jaarliks in ons skool se Rekeningkunde-uitslae gesien word.

Sy doen darem nie net “boeke” nie, maar is ook lief vir stap, kamp, lees en naaldwerk.

NW (Biologie) (graad 8-9), Landbouwetenskap (graad 10 – 12)

Mnr Botha matrikuleer aan Hoërskool Hugenote en behaal sy BSc (Hons Ekologie), OD (3 jaar) aan die Universiteit van Stellenbosch. Hy hou eers by Hoërskool Willowmore skool voordat hy by Hoërskool Overberg aansluit.

Hy is betrokke by rugby en krieket. Hierdie geliefde meneer se unieke menswees en geloof maak van hom iemand wat soveel leerders deur sy voorbeeld positief beïnvloed. Deur gereelde landbou-uitstappies bring hy die praktiese deel van die bedryf tot by sy leerders.

Hy is baie lief vir lees, slaap, tuinbou, hengel, musiek en om saam met sy gesin films te kyk.

Gasvryheidstudie (graad 10 – 12) en LO (graad 8, 9 en 10)

Me Groenewald is ‘n oudleerder van Hoërskool Overberg. Sy sluit by ons aan as Gasvryheidstudie-onderwyseres. Sy het voorheen in die kosbedryf gewerk en is ‘n kulinêre kenner en restaurantbestuurder.

Sy is ook verantwoordelik om tydens sportdae en ander funksies ons gaste welkom te laat voel en hulle met smullekker kos te bederf.

Me Groenewald is lief vir lees en geniet dit om haar passie vir kos in die kombuis uit te leef.

English First Additional Language ( grade 8 – 10) en Geografie (graad 12)

Me Burger matrikuleer aan die Hoërskool Jan van Riebeeck en behaal haar BA-graad , HOD. Sy gaan maak eers ‘n draai by Hoërskool Walvisbaai, Concordia College en ook St Paul’s College voordat sy by die Ovie-famile aansluit.

Sy rig netbal en atletiek af. Haar passie en liefde vir hierdie twee sportsoorte maak dat sy haarself goed as afrigter gekwalifiseer het. Van haar diskus-atlete kry gereeld provinsiale kleure. Sy is ook ‘n uitstekende netbalafrigter wat nie omgee om die ekstra myl vir haar span te loop nie.

Sy is baie lief vir stap, lees en reis. Sy het al in Duitsland saam met ons uitruilstudente ‘n draai gaan maak.

Lewenswetenskap (graad 10 – 12)

Me Petley matrikuleer aan die Hoërskool Pietersburg. Sy behaal haar BSc, HOD aan die Universiteit van Stellenbosch. Sy het ook voorheen by Hoërskool Sybrand van Niekerk en Hoërskool Eric Louw skoolgehou.

Hierdie juffrou is passievol oor hokkie en rig die afgelope 3 jaar ons skool se 0/18A- en 0/16A seunsspanne af . Haar Biologieleerders sal daarvan getuig dat sy ‘n kultuur van harde werk by hulle wil vestig en dat dit hulle help om goeie uitslae aan die einde van hulle Senior Sertifikaat Eksamen te behaal.

Sy is lief vir lees, “scrapbooking” en sport. Sy het drie woelwaters wat haar by die huis besig hou.

Rekenaartoepassingstegnologie (graad 10 – 12)

Me Cleophas matrikuleer aan die Hoërskool Hopefield waarna sy haar BEd VOO (EBW) by CPUT in Wellington voltooi.

Sy is betrokke by ons skool se noodhulp en rig ook atletiek af. Sy is ook die raakvat-juffrou wannneer daar pamflette en enige rekenaarwerk gedoen moet word. In haar vrye tyd geniet sy dit om te lees en spandeer graag tyd in die natuur.

EBW (graad 8), Besigheidstudies (graad 11), Wiskundige Geletterdheid (graad 11 en 12), Tegnologie (graad 9) en Landboutegnologie (graad 10)

Mnr Fourie voltooi sy skoolloopbaan aan Hoërskool Overberg en voltooi sy BEd VOO (EBW) aan CPUT, Wellington.

Hy is betrokke by die afrigting van rugby, krieket en atletiek.

Mnr Fourie speel self rugby in sy vrye tyd en wanneer hy nie op die sportveld is nie, geniet hy dit om te boer.

Lewensoriëntering (graad 8 – 12)

Me Bredenkamp matrikuleer aan die Hoërskool Bredasdorp en voltooi haar BEd (Psig) graad aan die Universiteit van Stellenbosch. Sy hou eers skool by Hoërskool Tulbagh voordat sy by Hoërskool Overberg aansluit.

Sy rig netbal en atletiek af en is verantwoordelik vir die CSV by die skool Sy is ook superintendent by Nerina koshuis. Hierdie juffrou het ‘n ongelooflike liefde vir .kinders en is op haar gelukkigste as sy ‘n verskil in ons leerders se lewe kan maak.

Geografie (graad 10-11) en Afrikaans (graad 8)

Mnr Barnard matrikuleer aan die Hoër Volkskool Potchefstroomen studeer aan die Noord-Wes Universiteit.

Hy rig atletiek en rugby af. Ons is baie opgewonde oor hierdie meneer se kennis van hekkieafrigting.

In sy vrye tyd geniet hy lees, kitaarspeel en die buitelewe.

Afrikaans (gr. 8 & 9) Engels (gr. 8)

Monique is ‘n gebore en getoë Paarliet. Sy matrikuleer by Paarl Gimnasium waarna sy by die Universiteit van Stellenbosch gradueer. Sy verwerf haar BA. HON in Vertaling en Redigering. Daarna gaan werk sy vir ‘n jaar in Nederland. Hierdie juffrou is Nederlands en Frans magtig.

Sy het ‘n passie vir mense, diere, tale en toer. In haar vrye tyd lees sy graag. Vir haar is sport ook baie belangrik en daarom rig sy ook hokkie af.

Natuurwetenskap (gr. 8 & 9) Tegnologie (gr. 8) Biologie (gr. 10)

Mnr. O’Leary matrikuleer aan die HTS Drostdy waarna hy B.Sc aan die Universiteit van Stellenbosch studeer.

Hy het ‘n liefde om met jongmense te werk en om te sien hoe hulle hul potensiaal ontwikkel en sukses behaal. In sy vrye tyd ry hy graag motorfiets. Branderplank ry is ook iets wat hy baie geniet. Mnr. O’Leary rig rugby, krieket en atletiek af. Hy is ook by die CSV betrokke.

Mevrou Hyman het in Sasolburg grootgeword. Sy matrikuleer aan die Hoërskool Robertson. Sy is as ‘n Gesertifiseerde Tegniese Rekenmeester gekwalifiseer. Sy is besig om aan haar B.Rek graad te werk. Sy is getroud en het twee dogtertjies.

Sy is lief vir bordspeletjies. Sy bak en versier graag karakterkoeke vir kinderpartytjies.

Wiskunde (gr.8 - 10) en Skeppende Kuns (g. 9)

Juffrou Anna-Mart is in Somerset-Wes gebore. Sy matrikuleer aan die Hoërskool Montana. Eers behaal sy haar B.Ed-graad by CPUT (Wellington) waarna sy B.Sc aan die Universiteit van Stellenbosch studeer.

Hierdie musikale juffrou kan ongelooflik mooi sing en gaan betrokke wees by die koor en Koesterklanke. In haar vrye tyd lees sy graag. Sy wil graag die wêreld sien en ander kulture ervaar

Wiskundige Geletterdheid (gr. 10 - 12) EBW (gr. 9)

Juffrou Dane is in Williston gebore. Sy matrikuleer aan Augsburg Gimnasium (Clanwilliam) waarna sy haar B.Ed FET by CPUT (Wellington) verwerf. Sy het eers vir drie jaar by die die Hoërskool Hexvallei skoolgehou voordat sy by die Ovie-familie aangesluit het.

Haar hond, Stella het ‘n baie spesiale plek in haar hart. Sy is ook lief vir mosaiek, lees en kamp. Sport is nog een van haar tydverdrywe en sy rig atletiek en netbal af. Haar droom is om vandag se jeug voor te berei vir die uitdagings van die lewe.

Vak

Mevrou Coetzee is ‘n gebore Caldonner. Sy matrikuleer aan die Hoër Handelskool Worcester en studeer daarna sekretarieel aan die Stellenbosch Kollege. Haar vriendelike en hulpvaardige diens by die skool word hoog op prys gestel.

In haar vrye tyd lees sy graag en sy doen ook naaldwerk.

Mevrou Hayward is die vriendelike stem wat jou groet wanneer jy die skool skakel. Sy is nie net sekretaresse nie, maar ook iemand wat altyd help waar sy kan. Sy is in Caledon gebore waar sy dan ook aan die Hoërskool Overberg matrikuleer. Sy behaal haar HOD Senior Primêr aan die Wellington Onderwyskollege waarna sy eers by Laerskool Lorraine in Port Elizabeth skoolhou. Sy onderrig ook later deeltyds Rekenaarstudie by die Hoërskool Overberg.

Haar kinders en kleinkinders speel ‘n baie belangrike rol in haar lewe.

Juffrou Albertyn is ‘n oudleerder van Hoërskool Overberg. Hierdie juffrou se hart klop warm vir haar skool. Sy behaal haar BA.MBK (HOD) aan die Universiteit van Stellenbosch.

Sy is die vakhoof vir Afrikaans en onderrig Afrikaans Huistaal gr. 10 - 12 asook Afrikaans Eerste Addisionele Taal. Sy is die skool se hokkie-organiseerder en rig hokkie en atletiek af.

In haar vrye tyd is sy boervrou en ma. Sy spandeer graag tyd saam met haar gesin en hulle troeteldiere. Hierdie juffrou is ook baie lief vir lees en vakansie hou op Buffelsbaai.

Mnr. Cronje studeer BCom aan die Universiteit van Pretoria. Hy behaal sy PGCE (FET) kwalifikasie aan die Noord-Wes Universiteit.

Hy het vir drie jaar by Hoërskool Nylstroom in Limpopo skoolgehou.

Hierdie saggeaarde meneer het sommer gou in die kinders se harte gekruip en speel ‘n belangrike rol by die afrigting van krieket en spiesgooi. Hy rig ook rugby af.

Hy is mal oor sport en speel graag krieket en gholf.

Mevrou Otto is in Heidelberg, Kaap gebore waar sy ook matrikuleer. Na 38 jaar in die onderwys word sy vakadviseur vir Afrikaans. Sy tree in 2018 af waarna sy ‘n aflospos by Hoërskool Overberg aanvaar.

Haar kennis en liefde vir taal is van onskatbare waarde vir elke leerder in haar klas. Sy het al verskeie handboeke en studiegidse help skryf.

Lees is haar gunsteling tydverdryf. Sy speel ook graag saam met haar twee kleinkinders. Hoërskool Overberg is werklik bevoorreg om hierdie juffrou in ons midde te hê.

Juffrou Jessica is nog ‘n oudleerder van Hoërskool Overberg. Na skool behaal sy haar B.ED FET (VOO) waarna sy by Hoërskool Overberg aansluit.

Hierdie energieke juffrou is ‘n inspirasie vir haar leerders. Sy is baie kunstig en weet hoe om haar vak vir die kinders ‘n fees te maak. Sy rig hokkie af en help met die skryf van die interskole krete.

In haar vrye tyd lees sy graag. Sy kyk ook Netflix en spandeer graag tyd saam met haar verloofde en vriende.

Mnr. Steenkamp is die man wat sorg dat die terrein en skool netjies en veilig is. Hy is in Moorreesburg gebore en matrikuleer aan die HTS Drostdy.

Hy hou daarvan om met sy hande te werk en sweis graag. Hy is ook baie lief daarvoor om te braai.